العيب

السلام عليكم

انا ملاحظ شئ غريب موجود فى أغلب شباب البلد هو كلمة عيب 1- عيب اشتغل بغير المؤهل مرة واحد سألنى على شغل وربنا وفقنى وبلغته بوجود عمل وحضر للقاهرة وبعدين اكتشف انه سوف يعمل فى شركة مقاولات عامل فنى خرسانة ب 550ج فى الشهر وده كان سنة 2001 رفعلى حاجبة وقالى انا اشتغل عامل دانا معايا دبلوم صناعة انا عاوز اشتغل موظف والله العظيم الشخص ده كان مش لاقى شغل الا فى موسم حصيد القمح او الفلاحة فى باليومية مع اى واحد عاوز نفر شتغل معاه فى الغيط والشغل فى البلد انتم عارفين يوم فيه وعشرة مافيش

الاتكالية يعنى انا اجلس فى بيتى واقف على الكوبرى او فى الشارع واتكل على شخص اخر يبحث لى عن عمل يعنى عيب ابحث عن عمل بنفسى ولنفسى ولو سالت الشاب ليه ماتروحشى تبحث عن عمل خارج المحافظة فى المدن الجديدة مثلاص يقولك اروح ادور واما الاقى شغل او لأ ويريح نفسه ويكلم اى واحد يبحث له عن شغلانة وخايف يروح يدور على شغل بنفسة خايف يتعب نفسه

عيب أروح اشتغل فى الغيط مع ابويا ازاى هو انا واخد مؤهل جامعى علشان اشتغل فلاح وده واضح من وجود أزمة عماله الزراعة التى تعانى منها بلدنا

عيب القى واحد بيرمى زبالة فى الشارع ولا بيتلفظ بألفاظ خارجة وده واضح مع انتشار عربات الكارتة وفى موقف البلد على الكوبرى ومافيش واحد يتكلم ويفهم الشخص ده بأن هذا السلوك وهذه الألفاظ خطأ وعيب تنقال الكل بيقول أنا مالى أنا هعدل الكون خلينى فى حالى

عيب نسبة التاعليم العالى فى قريتنا تكون عالية جدا ولسه فيه أمية فى البلد وأنا أقصد أمية القراءة والكتابة وأمية الثقافة والتحضر يعنى لازم يكون للشباب دور الريادة فى تغيير ألأنماط السلوكية الخاطئة المنتشرة فى بلدنا ولازم قبل مانحاول نغير الناس لازم نغير أنفسنا